Ademar Silvoso.

Ademar Silvoso é actor de teatro, cine e televisión desde 2014 (protagonista da longametraxe Nove de Novembro e personaxe recorrente en Serramoura, da TVG) e oficiante de vodas civís en Galicia. Dous públicos moi distintos —directores de casting e produtoras por un lado, parellas que preparan a súa voda polo outro— que tiñan que atopar o seu sen perderse.

El tíñao claro: un espazo branco, diáfano, sen adornos que distraian. A web tiña que estar á altura desa idea e funcionar igual de ben en castelán e en galego.

Deseñei e desenvolvín a web á medida en PHP, sen modelos nin WordPress: cabeceira, pé e textos centralizados, enderezos limpos e un selector de idioma que lembra a elección de cada visitante.

A portada formula dous camiños: actor ou oficiante. A parte de actor reúne traxectoria, habilidades escénicas, galería e currículo en PDF; a de oficiante explica como se prepara cada cerimonia, con fotografías en formato panorámico para que se vexa a parella e a contorna, e un dossier descargable. Completan o sitio o blog, os audiocontos con ligazóns a Spotify, Apple Podcasts e iVoox, e un formulario de contacto directo.

A galería percórrese arrastrando co rato ou esvarando no móbil, en bucle continuo. O menú móbil ocupa a pantalla completa sen necesidade de desprazarse, e as imaxes, fontes e estilos están optimizados para que todo cargue rápido.

Unha web bilingüe, rápida e doada de manter, que presenta as dúas profesións de Ademar coa mesma sobriedade ca súa proposta artística. Inclúe textos legais, xestión de cookies con consentimento, mapa do sitio e un arquivo llms.txt para que buscadores e asistentes de IA entendan quen é e que ofrece.