MF Appointment Booking.

Os negocios que traballan con cita —consultas, sesións de coaching, clases ou actividades— adoitan depender dunha plataforma externa de pagamento mensual, coas súas reservas fóra da súa web e funcións que dependen do plan contratado.

Quería ofrecer unha alternativa completa dentro do propio WordPress, cos datos na base de datos do negocio, e demostrar cun produto real, publicado e mantido, o tipo de desenvolvemento á medida que fago para empresas e axencias.

Un motor de reservas completo, feito desde cero. A túa clientela escolle localización, servizo e hora nun formulario por pasos, con calendario visual, campos personalizados que aparecen segundo as respostas anteriores e un resumo antes de confirmar. Engádese a calquera páxina cun bloque de Gutenberg, o shortcode [mfab] ou o widget de shortcode de Elementor.

Funciona cunha axenda xeral, sen crear profesionais, ou cun equipo no que cada profesional ten o seu propio horario. Cada localización ten a súa capacidade, o seu horario e o seu enderezo; hai modelos semanais, festivos, horarios especiais e bloqueos manuais. Tamén admite sesións de actividade con prazas compartidas e tarifas de adulto, neno, sénior ou personalizadas.

Os cobros son opcionais: reservas gratuítas, pagamento na recepción (efectivo, datáfono ou transferencia, con pagamentos parciais e saldo pendente) ou pagamento en liña coa túa propia conta de Stripe, PayPal ou Redsys, completo ou con sinal. Os datos da tarxeta introdúcense na páxina segura de cada pasarela e o plugin nunca os garda.

Para o negocio, un calendario de administración con vistas de día, semana e mes, cambios de hora arrastrando a cita, reservas creadas desde o panel, unha ficha de cada reserva con notas privadas e historial, e un directorio de clientes. A sincronización con Google Calendar é bidireccional: envía as reservas, recolle os cambios e cancelacións e bloquea as horas que xa tes ocupadas.

A túa clientela recibe correos de confirmación, recordatorio e cancelación —en texto ou con deseño HTML co teu logo e as túas cores—, engade a cita a Google Calendar, Outlook ou Apple Calendar e xestiónaa cunha ligazón privada, sen crear conta. Se o activas, tamén pode cambiar a hora dentro do prazo que fixes.

A aparencia axústase sen código, con vista previa en directo e control de contraste. Inclúe exportación a CSV e iCalendar, unha API REST de dispoñibilidade de só lectura, hooks para extensións, compatibilidade con WPML e Polylang, e as ferramentas de privacidade de WordPress para exportar ou borrar datos.

Publicado e aprobado no repositorio oficial de WordPress.org, con actualizacións frecuentes, unha guía de uso dentro do propio plugin e unha guía de migración para quen viña de versións anteriores.

Todas as funcións están incluídas, sen conta nin subscrición: se cobras en liña, só pagas as comisións da túa pasarela. O plugin vén en castelán, galego, éuscaro, catalán, inglés, francés, alemán e portugués, e funciona con WordPress 6.6 e PHP 8.2 ou superiores.